பாஜம் துன் சம்பந்தன் தமிழ்ப் பள்ளியின் 30ஆம் ஆண்டு பள்ளி விளையாட்டுப் போட்டி பாஜம் சீனப் பள்ளி மைதானத்தில் விமரிசையாக நடைபெற்றது. 5-3-2017 ஞாயிற்றுக்கிழமை நடைபெற்ற இப்போட்டி விளையாட்டிற்கு சிரம்பான் மாவட்ட கல்வி அதிகாரி வ.அமிர்தலிங்கம், பாஜம் துன் சம்பந்தன் தமிழ்ப்பள்ளி முன்னாள் மாணவர் அமைப்பின் தலைவர் டத்தோ ஆர்.ஆர். எம். கிருஷ்ணன், தொழிலதிபர் பிரவின்ராஜ் ஆகியோர் சிறப்பு வருகை தந்தனர். பெற்றோர் ஆசிரியர் சங்கத் தலைவர் மா.ஜெயரத்தினம் வர வேற்புரையாற்ற தலைமையாசிரியர் ந.சரவணன் தலைமையுரையோடு சிரம்பான் மாவட்ட கல்வி அதிகாரி வ. அமிர்தலிங்கத்தின் திறப்புரையுடன் போட்டி விளையாட்டுகள் ஆரம்பமாகின. கம்பீரமாக உடையணிந்து அணிவகுத்த மஞ்சள், நீலம், சிவப்பு இல்ல அணிவகுப்பை வ.அமிர்தலிங்கம் பார்வையிட்டு மரியாதை செலுத்தினார். பெற்றோர்களும் முன்னாள் மாணவர்களும் திரளாக வருகைத் தந்து போட்டி விளையாட்டை கண்டு களித்து ஆதரவு அளித் தனர். புதியதாக இப்பள்ளிக்கு தலைமையாசிரியர் பொறுப்பேற்றிருக்கும் ந.சரவணன் பெற்றோர்களின் ஆதரவிற்கு நன்றி கூறிக் கொண்டார். போட்டியில் வெற்றி பெற்றவர்களுக்கு பரிசுகள் வழங்கப்பட்டன.