11-வது ஐ.பி.எல். கிரிக்கெட் போட்டி வருகிற 7-ந்தேதி தொடங்குகிறது. இதில் பங்கேற்கும் விராட் கோலி தலைமையிலான பெங்களூர் ராயல் சேலஞ்சர்ஸ் அணி தீவிர பயிற்சியில் ஈடுபட்டு வருகிறது.

அந்த அணி இதுவரை மூன்று முறை (2009, 2011, 2016) இறுதிப்போட்டிக்கு முன்னேறி உள்ளது. ஆனால் 3 முறையும் தோல்வியையே சந்தித்தது. இந்த முறை கோப்பையை வெல்ல வேண்டும் என்று வேட்கையுடன் இருக்கிறது. இதுகுறித்து விராட் கோலி கூறியதாவது:-

பெங்களூர் அணியில் 10 ஆண்டுகளாக விளையாடி வருகிறேன். 3 முறை இறுதிப்போட்டிக்குள் நுழைந்தும் கோப்பையை வெல்லவில்லை. பெங்களூர் ரசிகர்களைவிட கோப்பையை வெல்ல வேண்டும் என்ற வேட்கையுடன் இருக்கிறேன். 100 சதவீதம் எனது பங்களிப்பை அளிப்பேன் என்று உறுதியாக கூறுகிறேன்.

கடந்த காலங்களில் பெங்களூர் அணியின் பேட்டிங் வரிசை வலுவாக இருப்பதை பார்த்து வருகிறோம். இந்த முறை ஏலத்தில் பந்துவீச்சிலும் பலம் வாய்ந்த வீரர்கள் தேர்வு செய்யப்பட்டு உள்ளனர். இதனால் கோப்பையை வெல்ல அதிக வாய்ப்பு இருக்கிறது என்ற நம்பிக்கை உள்ளது இவ்வாறு அவர் கூறினார்.