(ஆர்.குணா)  கோலாலம்பூர், 

தைப்பூச தினத்தன்று சந்திர கிரகணம் ஏற்படவிருப்பதால் அன்று ஆலயங்களில் கிரகண நேரத்தில் ஆலய நடைகள் மூடப்பட வேண்டுமென இந்து அமைப்புகள் திட்டவட்டமாக தெரிவித்தன.இது குறித்து மலேசிய இந்து சங்கத்தின் தலைவர் டத்தோ மோகன் ஷான் கூறுகையில், நம் நாட்டில் காலம் காலமாக கிரகண காலக்கட்டத்தில் ஆலயங்களுக்கு திருக்காப்பு போடப்படுகின்றது. ஆனால், இம்முறை சந்திர கிரகணம் தைப்பூச நாளன்று வருவதால் இது பெரும் விவகாரம் ஆகியிருப்பதாக அவர் தெரிவித்தார்.

தைப்பூச நாளில் மாலை மணி 7.48 முதல் இரவு 11.41 மணி வரையில் சந்திர கிரகணம் ஏற்படவிருப்பதாக இந்து பஞ்சாங்கங்கள் கூறுவதால் அந்நேரத்தில் ஆலய நடைகள் மூடப்பட வேண்டும். இந்த காலக்கட்டத்தில் ஆலயத்தில் பூஜைகள் நடந்தாலோ அல்லது பக்தர்கள் தங்களது வேண்டுதல்களை செய்தாலோ பல்வேறு பிரச்சினைகள் மனிதர்களுக்கு ஏற்படும் என இந்து ஆகமங்கள் தெரிவிப்பதாக மலேசிய இந்து சங்கத்தின் ஏற்பாட்டில் அதன் தலை மையகத்தில் இன்று மலேசியாவிலுள்ள இந்து அமைப்புகளுடன் நடைபெற்ற கலந்துரையாடலுக்குப் பின்னர் செய்தியாளர்களைச் சந்தித்த அவர் கூறினார்.

Read More: Malaysia Nanban News paper on 20.1.2018