நேற்று கனத்த மழையுடன் வீசிய புயல் காற்றில் ஈப்போவில் மிக பிரபலமான ஆலயங்களில் ஒன்றான அருள்மிகு தண்டாயுதபாணி ஆலயத்திற்கு சொந் தமான அரச மரத்து பிள்ளையார் கோவிலின் அரச மரம் வேரோடு சாய்ந்தது பலருக்கு அதிர்ச்சியை ஏற்படுத்தியது. சுமார் 112 ஆண்டு கால பழமையான கோவிலான அரச மரத்து பிள்ளையார் கோவில் அதிகமான பக்தர்களைக் கொண்ட கோவிலாகும். நேற்று மாலை 4.10 மணியளவில் ஈப்போ மாநகரை சுற்றி பலத்த புயல் காற்று வீசியது. சில நிமிடங்கள் நீடித்த புயல்காற்று பல்வேறு பகுதிகளில் சேதத்தை ஏற்படுத் தியது. சிலிபின் சாலையின் குறுக்கே பெரிய மரம் விழுந்ததால் போக்குவரத்து ஸ்தம்பித்தது. சம்பவம் நடந்த இடத்திற்கு விரைந்த ஈப்போ மாநகர் மன்ற உறுப்பினர் டத்தோ நரான் சிங் சாலையின் குறுக்கே விழுந்த மரத்தை அப்புறப்படுத்துவதற்கு நடவடிக்கை மேற்கொண்டார். புயல் சீற்றம் ஜாலான் லாகாட் பகுதியில் சேதத்தை ஏற்படுத்தியது. இங்கு அருள்பாலித்து வரும் அரச மரத்து பிள்ளையார் கோவில் அரச மரம் வேரோடு பெயர்ந்து சாய்ந்தது. அரச மரத்துடன் சேர்ந்திருந்த பிள்ளையார் சிலை பாதிக்கப்படவில்லை. எனினும் கோவில் கூரைப் பகுதிகள் சேதமடைந்தன.அரச மரம் வேரோடு சாய்ந்தது குறித்து தகவல் காட்டுத் தீ போல் பரவியதைத் தொடர்ந்து பொதுமக்கள் இதனை நேரில் காண்பதற்கு படையெடுத்து வந்தனர். எந்த ஒரு காரியத்தை தொடங்குவதற்கு முன்பு மூத்த முதல் கடவுள் பிள்ளையாரை வணங்குவோம். அரச மரத்து பிள்ளையார் மிகவும் பிரசித்திப் பெற்ற கோவில். 1905ஆம் ஆண்டு அரசு மரத்து பிள்ளையார் கோவில் அமைக்கப்பட்டது. இதனை ஸ்ரீ தண் டாயுதபாணி ஆலய நிர்வாகம் சிறப்பாக நிர்வகித்து வந்தது. நேற்று வேரோடு சாய்ந்த மரத்தை அப்புறப்படுத்தும் பணிகளை கவுன்சிலர் டத்தோ தங் கராஜா பார்வையிட்டார். ஆலய நிர்வாகத்தினருக்கு உதவ புந்தோங் சமூக நல அமைப்பின் தலைவர் செல்வராஜு அங்கு காணப்பட்டார்.