அம்பாங், ஜன.20- பண்டான் இண்டாவில் செயல்பட்டு வரும் 24 மணிநேர கடையில் கொள்ளையிட்ட இரு ஆடவர்களை போலீசார் கைது செய்துள்ளனர். இம்மாதம் 13ஆம் தேதி இந்த கொள்ளை சம்பவம் நிகழ்ந்துள்ளது. இதன் தொடர்பில் போலீசார் மேற்கொண்ட துரித சோதனை நடவடிக்கையில் 20 வயதுக்கு உட்பட்ட இளைஞர்கள் கைது செய்யப்பட்டனர். நேற்று முன்தினம் இரவு 11.40 மணியளவில் இங்குள்ள பூங்கா ராயா அடுக்குமாடியில் போலீஸ் அதிகாரிகள் முதல் கைது நடவடிக்கையை மேற்கொண்டுள்ளனர். கைது செய்யப்பட்டவரிடம் மேற்கொள்ளப்பட்ட விசாரணையின் மூலம் இந்த கொள்ளைச் சம்பவத்தில் சம்பந்தப்பட்ட மற்றொருவரை போலீசார் நள்ளிரவு 1 மணியளவில் பூச்சோங்கில் கைது செய்துள்ளனர். கைது செய்யப்பட்டவர்களிடமிருந்து 118 பல்வகை சிகரெட்டு பொட்டலங்கள், பாராங் கத்தி, தலைக்கவசம், இரு கைப்பேசிகள் உட்பட கொள்ளையிட பயன்படுத்தப்பட்ட காரையும் போலீசார் பறிமுதல் செய்தனர். கைது செய்யப்பட்ட இருவரும் மேல் விசாரணைக்காக 7 நாட்கள் தடுப்புக் காவலில் வைக்கப்பட்டுள்ளதாக அம்பாங் ஜெயா மாவட்ட துணை போலீஸ் தலைவர் முகமட் ஜாஹிட் ஹசான் தெரிவித்தார்.