யாழ். பல்கலைக்கழக மாணவர்களின் படுகொலைக்கு நீதிகோரி அமைதியான முறையில் முன்னெடுக்கப்பட்ட கவனயீர்ப்பு போராட்டம் சுமார் 4 மணித்தியாலங்களுக்குப் பிறகு தற்போது நிறைவடைந்துள்ளது. யாழ்.மாவட்ட செயலகத்திற்கு முன்பாக இன்று காலை 7.30 மணியளவில் ஆரம்பிக்கப்பட்ட குறித்த போராட் டம் 11.30 மணிக்கு முடிவடைந்தது. குறித்த கவனயீர்ப்பு போராட்டம் காரணமாக தடைப்பட்டிருந்த A9 வீதியூடான போக்குவரத்தும் வழமைக்கு திரும்பியுள்ளது. சுமார் 1500இற்கும் மேற்பட்ட மாணவர்கள் A9 பிரதான வீதியில் அமர்ந்திருந்து பல பதாதைகளை ஏந்தியவாறு தமது போராட்டத்தினை முன்னெடுத்திருந்தனர். பின்னர், யாழ் மாவட்ட அரசாங்க அதிபர் என் வேதநாயகம் மற்றும் ஆளுநரின் செயலாளரிடமும் தமது கோரிக்கை அடங்கிய மகஜர் ஒன்றினை கையளித்தார்கள். யாழ்.மாவட்ட செயலக வாயில் கதவுகள் அனைத்தையும் அடைத்து தமது போராட்டத்தை முன்னெடுத்ததால் செயலக பணிகள் யாவும் 100% முடக்கப்பட்டது.மாணவர்கள் தமது போராட்டத்தை இடை நிறுத்திக் கொண் டதன் பின்னர் யாழ்.மாவட்ட செயலகத்திற்குள் அலுவலகர்கள் சென்று பணிகளை முன்னெடுத்துள்ளார்கள். மேலும் தமது போராட்டம் முடிவடைந்து விடாது எனவும், உயிரிழந்த மாணவர்களுக்கான தீர்வு கிடைக்கும் வரை போராட்டங்கள் தொடரும் எனவும் மாணவர்கள் எச்சரித்தார்கள்.