சிங்கப்பூர், 

சிங்கப்பூரில் தன் காதலி கர்ப்பிணியாக இருப்பதை அறிந்தும், காதலியை தாக்கிய இந்தியருக்கு 10 வாரங்கள் சிறைத்தண்டனை விதித்து நீதிபதி தீர்ப்பு அளித்தார். சிங்கப்பூர்வாழ் இந்தியர் முகமது முஸ்தபா அலி (வயது 24). இவருக்கும் சாகிக்கா நதியா என்ற பெண்ணுக்கும் இடையே காதல். ஆனால் நதியா, முன்பு இன்னொருவரை காதலித்து உள்ளார். 

இந்த நிலையில் நதியாவின் முதல் காதல் தொடர்பாக அவருக்கும் முகமது முஸ்தபா அலிக்கும் இடையே கடந்த 2017ஆம் ஆண்டு, ஜூன் மாதம் 11ஆம் தேதி அதிகாலை நேரத்தில் தகராறு ஏற்பட்டது.இதில் ஆத்திரம் அடைந்த முகமது முஸ்தபா அலி, கர்ப்பமாக இருந்த தன் காதலியை முதுகிலும் தொடையிலும் சரமாரியாக தாக்கி படுகாயப்படுத்தினார். 

இது தொடர்பான புகாரின்பேரில் முகமது முஸ்தபா அலி மீது போலீசார் வழக்கு பதிவு செய்தனர். அந்த வழக்கை சிங்கப்பூர் மாவட்ட நீதிமன்ற நீதிபதி மேத்யூ ஜோசப் விசாரித்தார். விசாரணை முடிவில், முகமது முஸ்தபா அலி குற்றவாளி என கண்டார். தன் காதலி கர்ப்பிணியாக இருப்பதை அறிந்தும், அவரை முகமது முஸ்தபா அலி தாக்கியது மிக மோசமான செயல் என விமர்சித்த நீதிபதி அவருக்கு 10 வாரங்கள் சிறைத்தண்டனை விதித்து தீர்ப்பு அளித்தார்.