வாஷிங்டன், 

அமெரிக்கா தயாரிப்பான, எப் - 16 ரக போர் விமானத்தை இந்தியாவுக்கு எதிராக பாக்., தவறாக பயன்படுத்தியது குறித்து தீவிரமாக விசாரித்து வருவதாக அமெரிக்க அரசு தெரிவித்துள்ளது.

அண்டை நாடான, பாக்.,கின் பாலகோட்டில் உள்ள, ஜெய்ஷ் இ முகமது பயங்கரவாத அமைப்பின் முகாமை, இந்திய விமானங்கள் தாக்குதல் நடத்தி அழித்தன. அதைத் தொடர்ந்து, இந்தியாவுக்குள் நுழைவதற்கு, பாக்., விமானம் முயன்றது. இந்தியாவுக்குள் நுழைந்து, ராணுவ முகாம்களை தாக்கு வதற்கு, அமெரிக்க தயாரிப்பான, எப் - 16 ரக விமானத்தை, பாக்., பயன்படுத்தியது குறித்து, அமெரிக்காவிடம் மத்திய அரசு ஆதாரங்களுடன் தெரிவித்தது.

இந்நிலையில், அமெரிக்க வெளியுறவு துறை துணை செய்தித் தொடர்பாளர், ராபர்ட் பலாடினோ கூறியதாவது: அமெரிக்கா தயாரிப்பான, எப் - 16 போர் விமானத்தை, பாகிஸ்தான் தவறாகப் பயன்படுத்தியது குறித்து அளிக்கப்பட்டுள்ள ஆதாரங்களைப் பரிசீலித்து வருகிறோம். இது தொடர்பாக, பாக்.,கிடம் விளக்கம் கோரப்பட்டுள்ளது என்று அவர் கூறினார்.