காத்மாண்டு, 

நேப்பாள நாட்டின் பிரதமராக இருமுறை பதவி வகித்த துல்சி கிரி(93) உடல்நலக்குறைவால்  காலமானார்.  இந்தியாவின் அண்டைநாடான நேப்பாள நாட்டின் பிரதமராக கடந்த 1964-1965 மற்றும் 1975-77 ஆண்டுகளுக்கு இடையில் இருமுறை பதவி வகித்தவர் துல்சி கிரி. சிராஹா மாவட்டத்தில் 1926ஆம் ஆண்டில் பிறந்த கிரி, நேப்பாளி காங்கிரஸ் கட்சியில் இணைந்து தனது அரசியல் பணியை தொடங்கினார்.  

பஞ்சாயத்து சட்டத்தின் தீவிர ஆதரவாளராக இருந்த இவர், நேப்பாளத்தின் மன்னராக பிரேந்திரா ஆட்சி செய்த காலகட்டத்தில் நாட்டைவிட்டு வெளியேறி இலங்கையில் அரசியல் தஞ்சம் அடைந்து, வாழ்ந்து வந்தார். பின்னர், மன்னர் கியானேந்திர ஷா ஆட்சிக்காலத்தில் கடந்த 2005ஆம் ஆண்டு அவர் தாய்நாட்டுக்குத் திரும்பினார். அப்போது, பிரதமர் பதவிக்கு நிகராக கருதப்படும் நேப்பாள மந்திரிசபையின் துணைத் தலைவர் பதவியில் நிய மிக்கப்பட்டார். 

இந்நிலையில், சில ஆண்டுகளாக நுரையீரல் புற்றுநோயால் பாதிக்கப்பட்டிருந்த துல்சி கிரி, புத்தானில்கன்ட்டா பகுதியில் உள்ள தனது இல்லத்தில் உடல்நலக் குறைவால் 93ஆவது வயதில் மரணம் அடைந்தார்.