டமாஸ்கஸ்: ISIS அமைப்பின் தலைவர் அபுபக்கர் அல்பாக்தாதி கொல்லப்பட்டதாக தகவல் வெளியாகியுள்ளது. சிரியாவில் அமெரிக்கா நடத்திய வான்வழி தாக்குதலில் அவர் கொல்லப்பட்டதாக சிரிய நாட்டு தொலைக்காட்சிகள் செய்தி வெளியிட்டு வருகின்றன. எனினும் அவர் மரணித்ததற்கான ஆதாரங்கள் எதுவும் வெளியாகவில்லை. கடந்த 2014-ம் ஆண்டு ஐ.எஸ் அமைப்பு தலைவராக 46 வயதான பாக்தாதி பொறுப்பேற்றார். அது முதல் பல்வேறு நாடுகள் மீது ஐ.எஸ் அமைப்பினரின் தாக்குதல் தீவிரப்படுத்தப்பட்டது. இந்நிலையில் ஐ.எஸ் அமைப்பின் தலைமையிடமான ரக்வாவில், அமெரிக்க படைகள் நடத்திய வான்வழி தாக்குதலில் பாக்தாதி கொல்லப்பட்டதாக செய்திகள் வெளி வருகின்றன. ஐ.எஸ்.ஐ.எஸ் தலைவர் கொல்லப்பட்டதாக அறிவிக்கப்படுவது இது முதல் முறையல்ல. கடந்த சில மாதங்களுக்கு முன் வடக்கு ஈராக்கில் நடத்தப்பட்ட வான் வழித்தாக்குதலில், அபுபக்கர் அல் பாக்தாதி படுகாயமடைந்து, உயிருக்கு போராடி வருவதாகவும் தெரிவிக்கப்பட்டது. பாக்தாதி உயிரிழந்து விட்டதாக கடந்த சில மாதங்களாக பல வதந்திகள் தொடர்ந்து வெளியாகி வருகிறது என்பது குறிப்பிடத்தக்கது.