கோலாலம்பூர்:மலேஷியாவின் முன்னணி பல்கலையில், இந்து மதத்தை இழிவாக சித்தரிக்கும் வகையில் உருவாக்கப்பட்ட பாடத்துக்கு, அங்குள்ள சிறுபான்மை இந்துக்கள் கடும் எதிர்ப்பு தெரிவித்துள்ளனர். தென்கிழக்கு ஆசிய நாடுகளில் ஒன்றான மலேஷியாவின் முன்னணி பல்கலையாக, யு.டி.எம்., எனப்படும், 'யுனிவர்சிட்டி டெக்னாலஜி மலேஷியா' திகழ்கிறது. இப்பல்கலைக்காக உருவாக்கப்பட்ட ஒரு பாடப்பகுதியில், இந்துக்கள், தங்கள் உடலில் உள்ள அழுக்கை, நிர்வாண நிலை அடைவதற்கான, மத சம்பிரதாயங்களில் ஒன்றென கருதுவதாக கூறப்பட்டு உள்ளது. மேலும், இந்துக்கள் சுத்தம் இல்லாதவர்கள் என்றும், அவர்களுக்கு நாகரிகத்தை கற்றுத்தந்தது இஸ்லாம் மதமே என்றும் அதில் குறிப்பிடப்பட்டு உள்ளது. இதற்கு, மலேஷியாவில் உள்ள சிறுபான்மை இந்துக்கள் கடும் எதிர்ப்பு தெரிவித்துள்ளனர். இது தொடர்பாக, யு.டி.எம்., பல்கலை துணைவேந்தருடன் பேசியுள்ளதாகவும், அவர், தவறை சரி செய்வதாக வாக்குறுதி அளித்துள்ளதாகவும், மலேஷிய கல்வித்துறை துணை அமைச்சர் கமலநாதன் கூறியுள்ளார்.