சமீப காலமாக அரசியல் அரங்கில் அனல் கிளப்பி வரும் ஒரே நடிகரான கமல் ஹாஸனை 'பொர்க்கி' புகழ் சுப்பிரமணிய சாமி கடும் வார்த்தைகளால் திட்டியுள்ளது அதிர்ச்சியை அளித்துள்ளது. குறைந்தபட்ச அரசியல் நாகரீகம் கூட இல்லாமல் கமல் ஹாஸனை, 'முதுகெலும்பில்லாத முட்டாள்' என்று ட்விட்டரில் திட்டியுள்ளார் சுப்பிரமணிய சாமி. ஜல்லிக்கட்டு போராட்ட நேரத்தில் தமிழர்களை 'பொறுக்கிகள்' எனத் தொடர்ந்து திட்டி வந்தார் சு சாமி. இதைக் கண்டித்து ட்விட் போட்டிருந்தார் கமல் ஹாஸன். பதிலுக்கு கமல் ஹாஸனையும் 'பொர்க்கி' என்று குறிப் பிட்டார் சாமி. இதற்கு பதிலளித்த கமல், 'சாமியின் கேவலமான பதிவுகளுக்கு பதில் தர விரும்பவில்லை. காம ராஜ், அண்ணா & ராஜாஜி எல்லாம் நீ சொன்ன 'பொர்க்கி' இனத்தில் இணையற்ற தலைவர்கள். மோதி மிதித்து விடு பாப்பா..' என்று கூறியிருந்தார். இப்போது மீண்டும் கமலை வம்புக்கு இழுத்துள்ளார் சு சாமி. அவரது ட்விட்டரில் ஒருவர், "எப்படியாவது கமல் ஹாஸனை சமாதானப்படுத்தி பாஜகவில் இணைத்துவிடுங்கள்.அவரைப் போன்ற ஒருவர் அக்கட்சிக்குத் தேவை", என்று வேண்டுகோள் விடுத்திருந்தார். இதற்கு பதிலளித்துள்ள சு சாமி, "எனக்கு பாஜக பற்றி எதுவும் தெரியாது. ஆனால் கமல் ஹாஸன் என்ற முதுகெலும்பில்லாத கோழையை, சுயதம்பட்ட முட்டாளை கடுமையாக எதிர்க்கிறேன்," என்று கூறியுள்ளார். சு சாமியின் இந்த பதில் கட்சி பேதம் தாண்டி பலரையும் அதிர்ச்சிக்குள்ளாக்கியுள்ளது.