புதுடெல்லி,

 

ஜம்மு காஷ்மீரின் கதுவா பகுதியில் எட்டு வயது சிறுமி ஆசிபா பனோ, கொடூரமாக பாலியல் வன்கொடுமை செய்யப்பட்டு கொலை செய்யப்பட்ட சம்பவம் நாடு முழுவதும் அதிர்வலைகளை ஏற்படுத்தியுள்ளது. இந்த சம்பவத்துக்கு கடும் கண்டனம் தெரிவித்துள்ள மத்திய மந்திரி மேனகா காந்தி, சிறுமிகளுக்கு எதிராக பாலியல் குற்றம் செய்பவர்களுக்கு மரண தண்டனை விதிக்க வேண்டும் என்று தெரிவித்துள்ளார்.  

 

இது குறித்து மேனகா காந்தி கூறியிருப்பதாவது:- “ கதுவா சம்பவம் உள்பட சமீப காலமாக குழந்தைகளுக்கு எதிராக நடைபெறும் பாலியல் வன்கொடுமை எனக்கு மிகுந்த வேதனையை அளிக்கிறது. 12 வயதுக்கு கீழ் உள்ள  சிறார்களுக்கு எதிரான பாலியல் குற்றங்களை செய்பவர்களுக்கு மரண தண்டனை விதிக்கும் வகையில் சட்ட திருத்தம் கொண்டு வரும் நோக்கில்  எனது அமைச்சகம் பணியாற்றி வருகிறது” இவ்வாறு அவர் தெரிவித்துள்ளார்.