பண மதிப்பிழப்பின்  ஓராண்டு நிறைவை கறுப்பு தினமாக எதிர்க்கட்சிகள் நாடு முழுவதும் இன்று கடைபிடிக்கின்றன. தமிழகத்தில், தி.மு.க தன்னுடன் ஒருமித்த கருத்துடைய கட்சிகளுடன் இணைந்து, தமிழகத்தில் எட்டு மாவட்டங்களைத் தவிர்த்து, மற்ற மாவட்டத் தலைநகரங்களில் கண்டன ஆர்ப்பாட்டத்தை நடத்தின. மதுரை அண்ணா நகரில் நடந்த ஆர்ப்பாட்டத்தில், தி.மு.க செயல் தலைவர் ஸ்டாலின் கலந்துகொண்டார்.  முதலில், இந்த இடத்தில் ஆர்பாட்டம் நடத்த அனுமதி அளிக்காத காவல்துறை, நேற்று இரவு அனுமதி அளித்தது. இந்த ஆர்ப்பாட்டத்தில் கலந்துகொள்ள, மு.க.ஸ்டாலின் நேற்று மாலையே மதுரை  சென்றுவிட்டார்.

இன்று காலை, கறுப்புச் சட்டை அணிந்து, கட்சித் தொண்டர்களும் கூட்டணிக் கட்சியினரும் திரளாகக் கலந்துகொண்டனர். ஆர்ப்பாட்டத்தில் பேசிய மு.க.ஸ்டாலின், ''125 கோடி மக்களுக்குத் துன்பத்தை ஏற்படுத்திய இந்த நாள், கறுப்பு நாள். நள்ளிரவில் சுதந்திரத்தைப் பெற்ற நாம், தற்போது நள்ளிரவில் சுதந்திரத்தை இழந்து நிற்கிறோம். ஒட்டுமொத்த பணப்புழக்கத்தையும் முடக்கிய ஆட்சி, மோடி தலைமையிலான ஆட்சி. எந்தத் திட்டமிடலும் இல்லாமல், திடீரென்று பண மதிப்பிழப்பு நடவடிக்கையை அறிவித்தார்கள்.

அடுத்து, ஜி.எஸ்.டி-யால் வணிக சமூகத்தினர் பாதிக்கப்பட்டுள்ளனர். இதைக் கொண்டுவருவதற்கு முன் நான் அவகாசம் கேட்டேன். ஆனால் அவர்கள் தரவில்லை. மத்திய அரசின் வருவாய்த்துறை செயலாளர், ஜி.எஸ்.டி-யை மாற்றியமைக்க வேண்டும் என்று இப்போது கூறியுள்ளார் . தற்போது, குஜராத் தேர்தலுக்காக அதில் மாற்றம் கொண்டுவருவதாக மோடியும்  கூறியுள்ளார். மக்களைப் பாதிக்கும் எந்தத் திட்டத்தையும், எதற்கும் அஞ்சாமல் தி.மு.க எதிர்க்கும். மக்கள் பாதிக்கப்பட்டத்தற்கு மோடி பதில் சொல்லியே ஆக வேண்டும் '' என்று பேசினார்.