தூய்மை இந்தியா திட்டத்தின் தூதுவராகவே மு.க.ஸ்டாலின் ஆகலாம். அதற்கும் நான் எங்களுடைய அழைப்பை தெரிவிக்கிறேன் என்று தமிழக பாஜக தலைவர் தமிழிசை சவுந்தரராஜன் தெரிவித்துள்ளார்.

சென்னை கோட்டூர்புரத்தில் நடைபெற்ற டெங்கு விழிப்புணர்வு மருத்துவ முகாமில் தமிழிசை சவுந்தரராஜன் கலந்துகொண்டு பொதுமக்களுக்கு நிலவேம்பு கசாயம் வழங்கினார்.

பின்னர், அவர் செய்தியாளர்களிடம் கூறுகையில், ''டெங்கு காய்ச்சலைக் கட்டுப்படுத்த தமிழக அரசு மாவட்டங்கள் தோறும் உடனடியாக நடவடிக்கை எடுக்க வேண்டும். பிரதமர் மோடியின் தூய்மை இந்தியா திட்டத்தை திமுக செயல் தலைவர் மு.க.ஸ்டாலின் பின்பற்றத் தொடங்கிவிட்டார். அந்த வகையில் நான் அவருக்கு எனது பாராட்டுகளை தெரிவித்துக் கொள்கிறேன்.

யாராக இருந்தாலும் சுத்தம் செய்யும் பணியில் ஈடுபட்டால் அவர்களுக்கு எங்களது பாராட்டுகளை தெரித்துக் கொள்கிறோம். தூய்மை இந்தியா திட்டத்தின் தூதுவராகவே மு.க.ஸ்டாலின் ஆகலாம். அதற்கும் நான் எங்களுடைய அழைப்பை தெரிவிக்கிறேன்'' என்றார்.