சென்னை:

உடல்நிலை குறைவு காரணமாக மருத்துவமனையில் அனுமதிக்கப்பட்டிருக்கும் தனது கணவர் நடராஜனை சந்திக்க சசிகலா பரோலில் வந்துள்ளார். இந்நிலையில் பெரும்பாக்கத்தில் தனியார் மருத்துவமனையில் சிகிச்சை பெற்று வரும் தனது கணவர் நடராஜனை சசிகலா சந்தித்துள்ளார். சசிகலா வருகையை ஒட்டி அங்கு போலீஸ் பாதுகாப்பு போடப்பட்டுள்ளது. மருத்துவமனைக்குள் செல்லப்படும் அனைத்து வாகனங்களும் இரண்டு கட்ட சோதனைக்கு பிறகே அனுமதிக்கப்பட்டு வருகிறது. சசிகலா மட்டுமே நடராஜனை சந்திக்க அனுமதி அளிக்கப்பட்டுள்ளது. அவரது உறவினர்கள் மற்றும் தொண்டர்கள் செல்ல அனுமதி அளிக்காததால் அவர்கள் அனைவரும் மருத்துவமனைக்கு வெளியே உள்ளனர். 

நடராஜனுடனான சசிகலா சந்திப்பு சுமார் ஒரு மணி நேரம் மட்டுமே இருக்கும் என்று காவல்துறையினர் தெரிவித்துள்ளனர். இந்நிலையில் நடராஜனின் உடல்நிலை குறித்து தகவல் அளித்துள்ள மருத்துவமனை, கல்லிரல் மற்றும் சீறுநீரக உறுப்பு மாற்று சிகிச்சை செய்துகொண்ட நடராஜனின் உடல் தேறிவருகிறது என்று கூறியுள்ளனர். ட்ராக்கியாஸ்டோமி முறையில் நடராஜனுக்கு சுவாச உதவி அளிக்கப்பட்டு வருவதாகவும், தீவிர மருத்துவ கண்காணிப்பில் நடராஜன் உள்ளார் என்றும் தெரிவித்துள்ளனர்.