சென்னை,

நடிகர் கமல்ஹாசன்  அரசியல் குறித்தும் , அரசியல்வாதிகள் குறித்தும் அடிக்கடி டுவிட்டரில் கருத்து வெளியிட்டு  வருகிறார். குறிப்பாக தமிழக அரசு மீது பலவேறு குற்றசாட்டுகளை அவர் தொடர்ந்து கூறி வருகிறார்.

டெங்கு காய்ச்சலை கட்டுப்படுத்த வேண்டும் என்று அவர்  தமிழக அரசுக்கு கோரிக்கை விடுத்தார். சமீபத்தில் கமல்ஹாசன் விடுத்த டுவிட்டரில், “டெங்குவை கட்டுப்படுத்த தமிழக அரசு உரிய நடவடிக்கை எடுக்க வேண்டும். முடியா விட்டால் இந்த விஷயத்தில் இருந்து தமிழக அரசு ஒதுங்கிக் கொள்ள வேண்டும்“ என் அவர் கூறி இருந்தார்.

இந்த நிலையில் சென்னை கோபாலபுரம் டி.ஏ.வி. பள்ளி மாணவர் பார்கவ் டெங்கு காய்ச்சல் பாதித்து நேற்று உயிரிழந்தார். இது நடிகர் கமல்ஹாசனை ஆவேசப்படுத்தியுள்ளது. இது தொடர்பாக அவர் டுவிட்டரில் ஒரு கருத்தை வெளியிட்டுள்ளார். அதில் அவர் கூறி இருப்பதாவது:-

டெங்கு காய்ச்சல் பரவி வருகிறது, கட்டுப்படுத்துங்கள் என்று நான் பல தடவை கூறினேன். ஆனால் அவை எல்லாம் செவிடன் காதில் ஊதிய சங்கு போல ஆகி விட்டது. டெங்கு காய்ச்சலின் கோர முகத்துக்கு தற்போது கோபாலபுரம் டி.ஏ.வி. பள்ளி மாணவர் பார்கவ் உயிரை கொடுத்துள்ளார். டெங்குவை கட்டுப்படுத்த தமிழக அரசு இதற்கு பொறுப்பு ஏற்று உடனே பதவி விலக வேண்டும்.